តាកែវ៖ ករណីសិស្សប្រុសម្នាក់ត្រូវបានជនសង្ស័យដែលជាសិស្សដូចគ្នាកាប់ដាច់-ក នៅតាមផ្លូវជាតិលេខ២ ទាំងកណ្តាលថ្ងៃត្រង់ ស្ថិតនៅចំណុចឃុំប្រាំបីមុំ ស្រុកទ្រាំង ខេត្តតាកែវ បង្កការភ្ញាក់ផ្អើលដល់ពលរដ្ឋកាលពីថ្ងៃទី០៣ ខែកុម្ភៈ ឆ្នាំ២០២៣ ឥឡូវនេះសមត្ថកិច្ចចាប់បានជនសង្ស័យចំនួន ៣នាក់ដែលជាសិស្សសាលា។

នៅព្រឹកថ្ងៃទី០៦ ខែកុម្ភៈ ឆ្នាំ២០២៣ អាជ្ញាធរបានស្រាវជ្រាវ និងឈានដល់ការចាប់ខ្លួនជនសង្ស័យជាសិស្សចំនួន ៣នាក់ ខណៈពួកគេកំពុងតែសិក្សានៅក្នុងថ្នាក់ក្រោយជាប់ពាក់ព័ន្ធនឹងករណីឃាតកម្មលើសិស្សប្រុសអាយុ ១៧ឆ្នាំម្នាក់។

តាមការផ្សាយព័ត៌មានរបស់អធិការដ្ឋាននគរបាលស្រុកគិរីវង់ ជនសង្ស័យទាំង ៣នាក់នោះក្រោយពីបានធ្វើសកម្មភាពកាប់ជនរងគ្រោះស្ទើរតែដាច់កនោះ ពួកគេបានធ្វើពុតជាគ្មានរឿងអីកើតឡើង ដោយមករៀនក្នុងថ្នាក់ជាធម្មតាដើម្បីកុំឱ្យគេសង្ស័យ។ ប៉ុន្តែយ៉ាងណា ឈាមស្រែកស្បែកហៅ ជនសង្ស័យនៅតែមិនអាចគេចផុតពីសមត្ថកិច្ចបានឡើយ។

ជនសង្ស័យទាំង ៣នាក់មានអាយុ ១៧ឆ្នាំ ស្នាក់នៅក្នុងស្រុកគិរីវង់ ខេត្តតាកែវ និងជាសិស្សរៀននៅវិទ្យាល័យសុខអានទន្លាប់ដូចគ្នា។

បច្ចុប្បន្នកម្លាំងជំនាញអធិការដ្ឋាននគរបាលស្រុកទ្រាំង និងកម្លាំងជំនាញស្នងការដ្ឋាននគរបាលខេត្តតាកែវ បាននាំខ្លួនជនសង្ស័យទាំង ៣នាក់ទៅកាន់អធិការដ្ឋាននគរបាលស្រុកទ្រាំងដើម្បីកសាងសំណុំរឿងតាមនិតិវិធីច្បាប់បន្ត៕